வடிவமைப்புக் கல்வியில் புதிய வாய்ப்பு: ஓசூரில் உருவாகும் கல்வி நிறுவனம்

1950-களில், தெற்கு இத்தாலிக்கு வந்த சுற்றுலாப் பயணிகள் அழகாக உடையணிந்திருந்ததைக் கண்டு டொமினிகோ லெட்டியரிக்கு ஆடை வடிவமைப்பில் ஆர்வம் ஏற்பட்டது. பின்னர், மார்சோட்டோ என்ற ஜவுளி நிறுவனத்தில் பணியாற்றியபோது, அழகான ஆடைகளைப் பெரிய அளவில் தயாரிப்பதற்கான வாய்ப்புகளை அவர் அறிந்துகொண்டார்.

இதன் தொடர்ச்சியாகப் பல கல்வி நிறுவனங்களைத் தொடங்கிய அவர், 1967-ஆம் ஆண்டில் IUAD அகாடமியை நிறுவினார். இன்று இந்த நிறுவனம் இத்தாலியில் ஆடை வடிவமைப்பு மற்றும் பிற வடிவமைப்புத் துறைகளுக்கான முக்கியமான கல்வி நிறுவனமாக வளர்ந்துள்ளது.

இந்தியாவுக்கு ஏன் வடிவமைப்புக் கல்வி முக்கியம்?

இந்தியா இன்று உலக நாடுகளின் கவனத்தை ஈர்த்து வருகிறது. ஆடைகள், காலணிகள், கைப்பைகள், அணிகலன்கள் போன்ற பல பொருட்களைத் தயாரிப்பதிலும், அவற்றை உலகச் சந்தைகளுக்கு விற்பனை செய்வதிலும் இந்தியா முக்கிய இடத்தைப் பிடித்து வருகிறது.

பல சர்வதேச நிறுவனங்கள் தங்களுக்குத் தேவையான பொருட்களை இந்தியாவில் தயாரிக்க ஆர்வம் காட்டுகின்றன. இதனால் இந்தியாவில் உற்பத்தித் துறைக்கு நல்ல வாய்ப்புகள் உருவாகின்றன.

ஆனால், பொருட்களைத் தயாரிப்பது மட்டும் போதாது. அவை அழகாகவும், தரமாகவும், வாடிக்கையாளர்களைக் கவரும் வகையிலும் இருக்க வேண்டும். இதற்குத் தேவையான வடிவமைப்புத் திறன் கொண்ட இளைஞர்களும் பயிற்சி பெற்ற நிபுணர்களும் அதிக அளவில் தேவைப்படுகின்றனர்.

இந்தத் தேவையைப் பூர்த்தி செய்யும் நோக்கில், கோத்தாரி இண்டஸ்ட்ரியல் கார்ப்பரேஷன் லிமிடெட் (KICL) நிறுவனமும் இத்தாலியின் IUAD அகாடமியும் இணைந்துள்ளன. இவ்விரு நிறுவனங்களும் தமிழ்நாட்டின் ஓசூரில் புதிய வடிவமைப்புக் கல்வி நிறுவனத்தை அமைக்கத் திட்டமிட்டுள்ளன.

இதன் மூலம், இத்தாலியின் வடிவமைப்புக் கல்வி அனுபவத்தையும் இந்தியாவின் உற்பத்தித் திறனையும் ஒரே இடத்தில் இணைக்க முடியும்.

சரியான கூட்டணி

“சுதந்திர வர்த்தக ஒப்பந்தங்கள் அதிகரித்து வரும் இந்தக் காலத்தில், ஒரு பொருளின் வடிவமைப்புதான் மற்ற பொருட்களிலிருந்து அதை வேறுபடுத்திக் காட்டும் முக்கிய அம்சமாக இருக்கும்,” என்கிறார் KICL நிறுவனத்தின் செயல் தலைவர் ரஃபீக் அகமது.

KICL நிறுவனம் காலணி உற்பத்தித் துறையில் குறிப்பிடத்தக்க கவனம் செலுத்தி வருகிறது. அதன் தொடர்புடைய நிறுவனங்கள், அடிடாஸ் (Adidas), க்ராக்ஸ் (Crocs) போன்ற உலகப் புகழ்பெற்ற நிறுவனங்களுக்கான காலணிகளைத் தயாரிக்கின்றன.

“தமிழ்நாட்டில் காலணி உற்பத்தியில் ஈடுபட்டதன் மூலம், உலகச் சந்தையில் போட்டியிடுவதற்கு திறமையான பணியாளர்கள், பயிற்சி பெற்ற மனிதவளம் மற்றும் நல்ல வடிவமைப்பு ஆகியவை எவ்வளவு முக்கியம் என்பதை நாங்கள் நேரடியாகப் புரிந்துகொண்டோம்,” என்கிறார் ரஃபீக் அகமது.

இந்தத் திட்டத்திற்காகத் தமிழ்நாடு அரசுடனும் புரிந்துணர்வு ஒப்பந்தம் கையெழுத்திடப்பட்டுள்ளது. இந்தப் புதிய திட்டத்தில் ரூ.50 கோடி முதலீடு செய்யப்படவுள்ளது.

“மகாராஷ்டிரா இந்தியாவின் ஃபேஷன் தலைநகரமாக உள்ளது என்று தமிழ்நாடு முதலமைச்சர் சி. ஜோசப் விஜய்யிடம் தெரிவித்தேன். ஆனால், IUAD நிறுவனம் இங்கு தொடங்கப்பட்ட பிறகு, தமிழ்நாடும் இந்தியாவின் முக்கியமான ஃபேஷன் மையமாக மாறும்,” என்கிறார் ரஃபீக் அகமது.

இந்தத் திட்டத்திற்குத் தமிழ்நாடு தேர்ந்தெடுக்கப்பட்டதற்கு முக்கியக் காரணங்கள் உள்ளன. இங்கு ஏற்கெனவே பல தொழிற்சாலைகள் உள்ளன. தொழில்துறைக்குத் தேவையான பணியாளர்களும், கல்வி நிறுவனங்களும் அதிகமாக உள்ளன.

மேலும், ஓசூர் பெங்களூருவுக்கு அருகில் இருப்பதால், மாணவர்கள் இந்த இரண்டு நகரங்களிலும் உள்ள தொழில் நிறுவனங்களுடன் தொடர்புகளை ஏற்படுத்திக்கொள்ள முடியும்.

இந்தியாவில் பயிலும் மாணவர்களுக்கு, இத்தாலியில் கற்பிக்கப்படும் முறையிலேயே வடிவமைப்புக் கல்வியை வழங்குவது இந்தத் திட்டத்தின் முக்கிய நோக்கமாகும்.

“கோத்தாரி நிறுவனம் இந்தியாவின் தொழில்துறை அனுபவம், முதலீடு மற்றும் உற்பத்தித் திறனைக் கொண்டுவருகிறது. IUAD நிறுவனம் சர்வதேச வடிவமைப்புக் கல்வியையும் இத்தாலியின் அனுபவத்தையும் கொண்டுவருகிறது,” என்கிறார் IUAD அகாடமியின் தலைவர் மிக்கேல் பால்டசாரே லெட்டியேரி.

வெறும் படிப்பு அல்ல; செய்முறைப் பயிற்சிக்கும் முக்கியத்துவம்

தொடக்கத்தில் இந்தக் கல்வி நிறுவனம் மூன்று முக்கியப் பாடப்பிரிவுகளை வழங்கவுள்ளது:

ஆடை வடிவமைப்பு: புதிய ஆடைகளை உருவாக்குவது, அவற்றின் தோற்றம் மற்றும் வடிவத்தைத் திட்டமிடுவது.

அணிகலன் வடிவமைப்பு: காலணிகள், கைப்பைகள் மற்றும் பிற அணிகலன்களை வடிவமைப்பது.

ஃபேஷன் வணிகம் மற்றும் தகவல் தொடர்பு: ஃபேஷன் பொருட்களைச் சந்தைப்படுத்துவது, பிராண்டுகளை வளர்ப்பது மற்றும் வாடிக்கையாளர்களிடம் அவற்றைக் கொண்டு சேர்ப்பது.

இதனுடன் குறுகிய காலப் படிப்புகளும் தொழில்முறைப் பயிற்சிகளும் வழங்கப்படும்.

எதிர்காலத்தில் உள்துறை வடிவமைப்பு, கட்டடக்கலை, நகை வடிவமைப்பு உள்ளிட்ட கூடுதல் பாடப்பிரிவுகளையும் அறிமுகப்படுத்தத் திட்டமிடப்பட்டுள்ளது. சிறப்புத் துறைகளில் முனைவர் பட்டப் படிப்புகளையும் வழங்குவதற்கான திட்டங்கள் உள்ளன.

இந்த நிறுவனத்தின் முக்கியமான சிறப்பு என்னவென்றால், மாணவர்கள் புத்தகங்களைப் படிப்பதோடு மட்டும் நின்றுவிடாமல், நேரடியாகச் செயல்பட்டுக் கற்றுக்கொள்ளும் வாய்ப்பையும் பெறுவார்கள்.

மொத்தப் பயிற்சியில் சுமார் 30 சதவீதம் வகுப்பறைகளிலும் வடிவமைப்புக் கூடங்களிலும் நடைபெறும். மீதமுள்ள 70 சதவீதம் செய்முறைப் பயிற்சிக்கு ஒதுக்கப்படும்.

மாணவர்கள் புதிய பொருட்களின் மாதிரிகளை உருவாக்குதல், கணினி மூலம் வடிவமைத்தல், உற்பத்தி முறைகளைப் புரிந்துகொள்ளுதல் போன்றவற்றில் பயிற்சி பெறுவார்கள்.

இதனால், படிப்பை முடித்தவுடன் தொழிற்சாலைகள் மற்றும் நிறுவனங்களில் பணியாற்றுவதற்குத் தேவையான நடைமுறை அறிவைப் பெற முடியும்.

மேலும், IUAD இத்தாலியின் வேலைவாய்ப்பு இணையதளம் மூலம் மாணவர்களுக்கு வேலைவாய்ப்புத் தொடர்பான உதவிகள் வழங்கப்படும். இதன் மூலம் இத்தாலி மற்றும் ஐரோப்பிய நாடுகளில் உள்ள ஃபேஷன் நிறுவனங்களில் வேலைவாய்ப்புகளைத் தேடுவதற்கான வாய்ப்பும் கிடைக்கும்.

IUAD நிறுவனம் 90 சதவீதம் மாணவர்களுக்கு வேலைவாய்ப்பு உறுதி செய்யப்பட்டுள்ளது .

மாணவர்களை வேலைக்குத் தயார்படுத்துவதே நோக்கம்

“வடிவமைக்கத் தெரிந்த பட்டதாரிகளை உருவாக்குவது மட்டுமே எங்களுடைய நோக்கம் அல்ல. ஒரு புதிய பொருளைப் பற்றிய யோசனை உருவாவதிலிருந்து, அதை வடிவமைத்து, ஒரு பிராண்டாக உருவாக்கி, சந்தையில் விற்பனை செய்வது வரை அனைத்தையும் புரிந்துகொள்ளும் நிபுணர்களை உருவாக்க விரும்புகிறோம்,” என்கிறார் கோத்தாரி–IUAD திட்டத்தின் இயக்குநர் டாக்டர் என். மோகன்.

இந்தியாவில் உள்ள இளைஞர்களின் திறமையை வளர்த்து, உலகத் தரத்திலான பொருட்களை வடிவமைக்கவும் தயாரிக்கவும் அவர்களைத் தயார்படுத்துவதே இந்தக் கூட்டணியின் நோக்கமாகும்.

இதன் மூலம் இந்திய நிறுவனங்களுக்கும் சர்வதேச பிராண்டுகளுக்கும் தேவையான திறமையான பணியாளர்கள் கிடைக்க வாய்ப்பு உருவாகும்.

“இத்தாலியில் உள்ள கல்வி நிறுவனத்தை இந்தியாவுக்குக் கொண்டுவந்து, அங்கு கற்பிக்கப்படுவதையே இங்கே அப்படியே செய்வது எங்களுடைய நோக்கம் அல்ல. இத்தாலியின் சிறந்த வடிவமைப்பு அனுபவத்தையும் இந்தியாவின் பலத்தையும் ஒன்றிணைப்பதே எங்களுடைய நோக்கம்,” என்கிறார் டாக்டர் மோகன்.

இதன் மூலம், வெளிநாடுகளுக்குச் செல்லாமல் தமிழ்நாட்டிலேயே சர்வதேசத் தரத்துக்கு இணையான வடிவமைப்புக் கல்வியைப் பெறும் வாய்ப்பு இளைஞர்களுக்குக் கிடைக்கலாம்.

எதிர்காலத்தில் மேலும் பல இடங்களில் கல்வி வளாகங்களைத் தொடங்கவும் திட்டமிடப்பட்டுள்ளது. இதற்காக ஹரியானா, கான்பூர், ஆக்ரா உள்ளிட்ட முக்கியத் தொழில் மையங்களில் விழிப்புணர்வு நிகழ்ச்சிகளை நடத்தி, தொழில் நிறுவனங்களுடன் தொடர்புகளை வளர்க்கவும் திட்டமிடப்பட்டுள்ளது.

-Sanjay vijaykumar

This is a translated version. Click here for the original.