இந்தியா-நியூஸிலாந்து ஒப்பந்தம் அமலுக்கு வருகிறது!

இந்தியா நியூஸிலாந்து இடையேயான சுதந்திர வர்த்தக ஒப்பந்தம் (Free Trade Agreement – FTA)  இன்றுமுதல் அமலுக்கு வருகிறது.

இதுதொடர்பாக கடந்த ஆண்டு மார்ச் 16 தேதி தொடங்கிய பேச்சுவார்த்தை, 9 மாதங்கள் கழித்து, 22 டிசம்பர் 2025ல் நிறைவுபெற்றது. இந்த ஒப்பந்தம் இந்த ஆண்டு ஏப்ரல் 27 ஆம் தேதி கையெழுத்தானது. இந்த திட்டமானது, 2030-ஆம் ஆண்டுக்குள் இரு நாடுகளுக்கும் இடையிலான பொருட்கள் மற்றும் சேவைகளின் இருதரப்பு வர்த்தகத்தை இரட்டிப்பாக்கி, 7 பில்லியன் நியூசிலாந்து டாலராக (ரூ. 35,000 கோடி) உயர்த்துவதை இலக்காகக் கொண்டுள்ள, India–New Zealand Strategic Partnership: Roadmap to 2030 திட்டத்திற்கு துணையாக இருக்கிறது.

இந்த ஒப்பந்தம் குறித்து பேசியுள்ள, மத்திய வர்த்தகம் மற்றும் தொழில்துறை அமைச்சர் பியூஷ் கோயல், “இந்தியாவை பொறுத்தவரை இந்த ஒப்பந்தம் நியூசிலாந்து சந்தையில் 100 சதவீத வரி விலக்கு அளிக்கிறது. இது இந்திய ஏற்றுமதியாளர்களுக்குப் புதிய வாய்ப்புகளை உருவாக்குகிறது. குறிப்பாக, குறு, சிறு மற்றும் நடுத்தரத் தொழில் நிறுவனங்கள் (MSMEs), கைவினைக் கலைஞர்கள், விவசாயிகள் மற்றும் பெண் தொழில்முனைவோர் இதன் மூலம் பெரும் பயனடைய வாய்ப்புள்ளது.

விவசாயிகளைப் பொறுத்தவரை, இந்த ஒப்பந்தம் புதிய வாய்ப்புகளுடன், உரிய பாதுகாப்பு நடவடிக்கைகளையும் ஒருங்கிணைக்கிறது. ஆப்பிள், கிவி பழங்கள் மற்றும் தேன் ஆகியவற்றுக்கான செயல்திட்டங்களுடன் கூடிய வேளாண் உற்பத்தித்திறன் கூட்டாண்மை, சிறப்பு மையங்களை (Centres of Excellence) நிறுவுதல் ஆகியவற்றின் மூலம், பழத்தோட்டங்களைச் சிறப்பாக நிர்வகிப்பது, அறுவடைக்குப் பிந்தைய இழப்புகளைக் குறைப்பது மற்றும் வேளாண் உற்பத்தித்திறனை மேம்படுத்துவது ஆகியவை ஊக்குவிக்கப்படும். இதன் மூலம், நாடு முழுவதும் விவசாயிகளின் வருமானத்தை அதிகரிக்க வழிவகை செய்யப்படும்,” என்றார்.

இந்த ஒப்பந்தம் குறித்து பேசியுள்ள, நியூசிலாந்தின் வர்த்தகம் மற்றும் முதலீட்டுத் துறை அமைச்சர் டாட் மெக்லே, “இந்தியா–நியூசிலாந்து தடையற்ற வர்த்தக ஒப்பந்தம் நடைமுறைக்கு வருவது, இரு நாடுகளுக்கும் இடையிலான உறவில் ஒரு முக்கிய மைல்கல்லாக இருக்கிறது. நியூசிலாந்து ஏற்றுமதியாளர்களைப் பொறுத்தவரை, இந்த ஒப்பந்தம் 140 கோடி நுகர்வோர்களைக் கொண்ட, உலகின் மிக வேகமாக வளர்ந்து வரும் முக்கியப் பொருளாதாரங்களில் ஒன்றான, இந்தியச் சந்தையில் நுழைவதற்கான வாய்ப்பைத் திறந்துவிடுகிறது.

தற்போது இந்தியாவுக்கு நியூசிலாந்து மேற்கொண்டு வரும் ஏற்றுமதிகள், இறக்குமதி வரிகளை நீக்குவதன் மூலமாகவோ அல்லது கணிசமாகக் குறைப்பதன் மூலமாகவோ பயனடையும். அதே நேரத்தில், இந்தியாவில் இருந்து ஏற்றுமதி செய்யப்படும் அனைத்துப் பொருட்களும், நியூசிலாந்து சந்தையில் 100 சதவீத வரி விலக்குடன் நுழைய முடியும். இது இந்திய ஏற்றுமதியாளர்களுக்குப் புதிய வாய்ப்புகளை உருவாக்கும். இது, நியூசிலாந்துடன் தடையற்ற வர்த்தக ஒப்பந்தங்களைக் கொண்டுள்ள பிற நாடுகளின் ஏற்றுமதியாளர்களுக்கு இணையான போட்டி வாய்ப்பையும் இந்திய ஏற்றுமதியாளர்களுக்கு வழங்குகிறது.
இந்த ஒப்பந்தத்தின் வெற்றி என்பது, இது உருவாக்கும் வாய்ப்புகளையும், இரு நாடுகளின் நிறுவனங்கள் இந்த ஒப்பந்தத்தை எந்த அளவுக்குப் பயன்படுத்திக் கொள்கின்றன என்பதையும் பொறுத்தே இறுதியில் மதிப்பிடப்படும்,” என்றார்.

இந்தியாவில் தயாரிக்கப்பட்ட ஒரு JCB இயந்திரம் முதன்முறையாக நியூசிலாந்துக்கு ஏற்றுமதி செய்யப்படுவதை மத்திய வர்த்தகம் மற்றும் தொழில்துறை அமைச்சர் கொடியசைத்துத் தொடங்கி வைத்தார். இந்த ஒப்பந்தம் நடைமுறைக்கு வரும் நாளில், விவசாயம், ரத்தினங்கள் மற்றும் ஆபரணங்கள், பொறியியல், விளையாட்டுப் பொருட்கள், காலணிகள் மற்றும் தோல் பொருட்கள் உள்ளிட்ட பல்வேறு துறைகளின் தயாரிப்புகளுக்கான ஏற்றுமதி தொடக்க நிகழ்வுகளும் திட்டமிடப்பட்டுள்ளன. இந்த முயற்சிகள், இந்திய உற்பத்தியாளர்களின் நம்பிக்கையையும், நாடு முழுவதும் உள்ள ஏற்றுமதியாளர்களுக்கு இந்த ஒப்பந்தம் மூலம் கிடைக்கப்போகும் வாய்ப்புகளையும் காட்டுகின்றன.

நியூசிலாந்து, இந்திய ஏற்றுமதிப் பொருட்களை உள்ளடக்கிய அனைத்து வரி வகைகளுக்கும் (Tariff Lines) சுங்க வரியை நீக்கியுள்ளது. இதன் மூலம், முன்பு அதிகபட்சமாக 10 சதவீதம் வரை விதிக்கப்பட்டிருந்த இறக்குமதி வரிகள் நீக்கப்பட்டுள்ளன. மரக்கட்டைகள், கோக்கிங் நிலக்கரி (Coking Coal), உலோகக் கழிவுகள் மற்றும் உலோகத் துண்டுகள் ஆகியவற்றுக்கு வரி இல்லாத சந்தை அணுகல் வழங்கப்படுவதும், உற்பத்தித் துறை மற்றும் குறு, சிறு மற்றும் நடுத்தரத் தொழில் நிறுவனங்களின் (MSMEs) விநியோகச் சங்கிலிகளை மேலும் வலுப்படுத்தும். மருந்துத் துறை மற்றும் மருத்துவச் சாதனங்கள் தயாரிப்புத் துறையும் எளிமைப்படுத்தப்பட்ட ஒழுங்குமுறை நடைமுறைகளால் பயனடையும்.

நியூசிலாந்து, இதுவரை தனது வர்த்தக ஒப்பந்தங்களில் வழங்கியிராத அளவுக்கு விரிவான சேவைகள் துறை சலுகைகளை இந்த ஒப்பந்தத்தில் வழங்கியுள்ளது. சுமார் 118 துறைகளில் சந்தை அணுகலும், சுமார் 139 துணைத் துறைகளில் மிகவும் சாதகமான வர்த்தக நாடு (Most-Favoured-Nation – MFN) அடிப்படையிலான சலுகைகளும் வழங்கப்பட்டுள்ளன. மேலும், முதல்முறையாக, சுகாதாரம் மற்றும் பாரம்பரிய மருத்துவச் சேவைகள் துறைகளில் பிரத்யேக சந்தை அணுகலை நியூசிலாந்து வழங்கியுள்ளது. இதில் ஆயுர்வேதம், யோகா மற்றும் பிற ஆயுஷ் (AYUSH) மருத்துவ முறைகளும் அடங்கும்.

இந்திய இளைஞர்கள் மற்றும் தொழில் வல்லுநர்கள், ஒவ்வோர் ஆண்டும் 5,000 தற்காலிக வேலைவாய்ப்பு நுழைவு விசாக்கள் (Temporary Employment Entry Visas) மற்றும் 1,000 வேலை மற்றும் சுற்றுலா விசாக்கள் (Working Holiday Visas) என்ற ஒதுக்கீட்டின் கீழ் நியூசிலாந்துக்குச் செல்லும் வாய்ப்பைப் பெறுவார்கள். இந்திய மாணவர்களுக்கு எண்ணிக்கை அடிப்படையிலான எந்த உச்சவரம்பும் விதிக்கப்படாது. STEM துறைகளில் இளங்கலை மற்றும் முதுகலைப் பட்டம் பெறும் மாணவர்களுக்கு, படிப்பை முடித்த பிறகு மூன்று ஆண்டுகள் வரை பணிபுரியும் உரிமை வழங்கப்படும். முனைவர் பட்டம் (PhD) பெறுபவர்களுக்கு நான்கு ஆண்டுகள் வரை இந்த உரிமை கிடைக்கும்.

வேளாண் உற்பத்தித்திறன் கூட்டாண்மை (Agricultural Productivity Partnership) இந்த ஒப்பந்தத்தின் முக்கியக் அம்சமாக இருக்கிறது. சுங்க வரிச் சலுகைகளை தாண்டி, உலகத் தரம் வாய்ந்த தொழில்நுட்பம், பயிற்சி மற்றும் சிறந்த நடைமுறைகளை இந்திய விவசாயிகளிடம் கொண்டு சேர்ப்பதை இந்த ஒப்பந்தம் நோக்கமாகக் கொண்டுள்ளது. இதில் கிவி பழங்கள், ஆப்பிள்கள் மற்றும் தேன் ஆகியவற்றுக்கான பிரத்யேக செயல்திட்டங்கள் இடம்பெற்றுள்ளன. மேலும், தோட்டக்கலை, வனவியல், கால்நடை வளர்ப்பு மற்றும் மீன்வளம் ஆகிய துறைகளிலும் இரு நாடுகளுக்கும் இடையிலான ஒத்துழைப்பு விரிவுபடுத்தப்படும்.

மேலும், கிவி பழங்கள், ஆப்பிள்கள் மற்றும் தேன் ஆகியவற்றுக்கான சிறப்பு மையங்களை (Centres of Excellence) நிறுவுவதற்குத் தேவையான தொழில்நுட்ப உதவிகளை நியூசிலாந்து வழங்குகிறது. கிவி பழங்களுக்கான செயல்திட்டத்தின் முதல் கட்டத்திற்காக, நாகாலாந்தின் ஃபுட்செரோ (Pfutsero) மற்றும் உத்தரகண்டின் மக்ரா (Magra) ஆகிய இடங்கள் அடையாளம் காணப்பட்டுள்ளன. ஆப்பிள் சாகுபடிக்கான மேலும் இரண்டு சிறப்பு மையங்களை இமாச்சலப் பிரதேசம் மற்றும் உத்தரகண்டில் அமைக்கத் திட்டமிடப்பட்டுள்ளது. உத்தரப் பிரதேசம் மற்றும் மேற்கு வங்கத்தில், தேனுக்கான செயல்திட்டத்தின் கீழ் சிறப்பு மையங்கள் அமைக்கத் திட்டமிடப்பட்டுள்ளது.

ஆப்பிள்கள், கிவி பழங்கள் மற்றும் மானுகா தேன் (Mānuka Honey) ஆகியவற்றுக்கான அனைத்து வரி விகித ஒதுக்கீடுகளும் (Tariff Rate Quotas), அதற்குரிய செயல்திட்டங்கள் செயல்படுத்தப்படுவதுடன் முறையாக இணைக்கப்பட்டுள்ளன. இதனை கூட்டு வேளாண் உற்பத்தித்திறன் கவுன்சில் (Joint Agriculture Productivity Council) மேற்பார்வையிடும். இந்தியாவில் 20 பில்லியன் அமெரிக்க டாலர் மதிப்பிலான முதலீடுகளை ஈர்ப்பதற்கு நியூசிலாந்து உறுதியளித்துள்ளது. இந்த முதலீடுகள் வேளாண்மை, உற்பத்தித் துறை, உள்கட்டமைப்பு மற்றும் புத்தொழில் நிறுவனங்கள் (Start-ups) ஆகிய துறைகளுக்குப் பயனளிக்கும் என எதிர்பார்க்கப்படுகிறது. மேலும், ‘மேக் இன் இந்தியா’ திட்டத்தின் நோக்கங்களுக்கு ஏற்றவாறு, புத்தாக்கம், தொழில்முனைவு மற்றும் வேலைவாய்ப்பு உருவாக்கத்திற்கும் ஆதரவளிக்கும்.

விவசாயிகள், பால் உற்பத்தியாளர்கள், மீனவர்கள் மற்றும் கிராமப்புற மக்களின் நலன்களைப் பாதுகாக்கும் வகையில், பால் மற்றும் பால் பொருட்கள், சர்க்கரை, சமையல் எண்ணெய்கள் மற்றும் முக்கிய வேளாண் விளைபொருட்கள் போன்ற முக்கிய துறைகள் சுங்க வரிச் சலுகைகளிலிருந்து விலக்கப்பட்டுள்ளன. மேலும், உண்மையான இந்திய ஏற்றுமதியாளர்களுக்கு மட்டுமே இந்த ஒப்பந்தத்தின் பலன்கள் சென்றடைவதை உறுதிசெய்ய, வலுவான மூலப்பொருள் மற்றும் உற்பத்தி நாட்டை நிர்ணயிக்கும் விதிகள் (Rules of Origin), இருதரப்பு பாதுகாப்பு நடைமுறை (Bilateral Safeguard Mechanism) மற்றும் வர்த்தகச் சலுகைகளைத் தவறாகப் பயன்படுத்துவதைத் தடுக்கும் கடுமையான விதிகள் ஆகியவை இடம்பெற்றுள்ளன.

இந்த ஒப்பந்தம், இந்தியாவின் குறு, சிறு மற்றும் நடுத்தரத் தொழில் நிறுவனங்கள், பெண்கள் தலைமையிலான நிறுவனங்கள், புத்தொழில் நிறுவனங்கள், கைவினைக் கலைஞர்கள் மற்றும் முதன்முறையாகத் தொழில் தொடங்கும் தொழில்முனைவோர் ஆகியோருக்கு வளர்ந்த வெளிநாட்டுச் சந்தையைத் திறந்துவிடுகிறது. சுங்க வரி இல்லாத வர்த்தகம் மற்றும் விரைவான சுங்க நடைமுறைகள் மூலம், பொருட்களை நியூசிலாந்து சந்தைக்குக் கொண்டு சேர்ப்பதற்கான மொத்தச் செலவு குறைவதுடன், அதிக வாடிக்கையாளர்களைச் சென்றடையும் வாய்ப்பும் விரிவடையும்.

கட்டமைக்கப்பட்ட ஒத்துழைப்பு நடவடிக்கைகள் மூலம், வர்த்தகம் தொடர்பான தகவல்களையும் நியூசிலாந்தின் சிறு மற்றும் நடுத்தர நிறுவனங்களின் (SME) வணிகக் கட்டமைப்புடன் இணைவதற்கான வாய்ப்புகளையும் இந்திய நிறுவனங்கள் அதிக அளவில் பெற முடியும். குறிப்பாக, பெண்கள் மற்றும் இளைஞர்களுக்குச் சொந்தமான நிறுவனங்களுக்கு இதில் முக்கியத்துவம் அளிக்கப்படும். மேலும், இந்தியப் புவியியல் குறியீட்டுப் பொருட்களை (Geographical Indications – GI) பதிவு செய்வதற்கான நடைமுறைகளை எளிதாக்கவும் நியூசிலாந்து உறுதியளித்துள்ளது. இதன் மூலம், கிராமப்புறக் கைவினைக் கலைஞர்கள் மற்றும் பாரம்பரியத் தொழில்களுடன் தொடர்புடைய பொருட்களுக்குப் பாதுகாப்பு வழங்கவும், அவற்றின் சந்தை வாய்ப்புகளை விரிவுபடுத்தவும் புதிய வழிகள் உருவாகும்.