நடிகர் அஜித் குமார் நடிப்பில் சமீபத்தில் வெளியாகி, ரசிகர்கள் மத்தியில் மாபெரும் வரவேற்பைப் பெற்ற திரைப்படம் ‘குட் பேட் அக்லி’.
இயக்குனர் ஆதிக் ரவிச்சந்திரன் இயக்கத்தில், ஒரு ‘ஃபேன் பாய்’ படமாக அமைந்த இந்த வெற்றிக்குப் பிறகு, அஜித் குமார் தனது விருப்பமான கார் ரேஸிங்கில் அதிக கவனம் செலுத்தி வருகிறார். இது தொடர்பான அவரது பயிற்சிகள் மற்றும் சாகச வீடியோக்கள் சமூக வலைதளங்களில் ரசிகர்கள் மத்தியில் பெரிய அளவில் சென்றடைந்து வருகின்றன.
இந்த பரபரப்பான சூழலில், நடிகர் அஜித் குமார் தனது மனைவி ஷாலினி மற்றும் மகன் ஆத்விக் உடன் கேரளா மாநிலம் பாலக்காட்டில் அமைந்துள்ள பிரசித்தி பெற்ற ஊட்டுக்குளங்கரா பகவதி அம்மன் கோயிலுக்குச் சென்றுள்ளார்.
அஜித் குமார், பாரம்பரிய உடையான வெள்ளை வேட்டி மற்றும் சட்டை அணிந்து, பக்திப் பரவசத்துடன் சாமி தரிசனம் செய்தபோது எடுக்கப்பட்ட புகைப்படங்கள் தற்போது சமூக வலைதளங்களில் தீவிரமாகப் பரவி வருகின்றன.
இந்தக் கோவிலில் எடுக்கப்பட்ட புகைப்படங்களில், அஜித்தின் சட்டை சற்று விலகிய நிலையில், அவரது வலது மார்புப் பகுதியில் ஒரு டாட்டூ இருப்பதை ரசிகர்கள் கூர்ந்து கவனித்துள்ளனர். இந்த டாட்டூ தற்போது ரசிகர்களிடையே வைரலாகிவருகிறது.
இந்த டாட்டூவை பலரும் இந்தக் கோவிலின் தெய்வமான பகவதி அம்மனின் உருவத்தைத்தான் அஜித் டாட்டூவாகக் குத்தியிருக்கிறார் என்றும், இது அவரது குலதெய்வத்தின் மீதான பக்தியைக் காட்டுகிறது என்றும் இணையத்தில் கருத்து தெரிவித்து வருகின்றனர்.
